गैरआवासीय नेपाली संघ (एनआरएनए)मा उम्मेदवारहरुले मनोनयन दर्ता गराउने प्रक्रिया जारी

गैरआवासीय नेपाली संघ (एनआरएनए)मा उम्मेदवारहरुले मनोनयन दर्ता गराउने प्रक्रिया जारी रहेको छ ।

गएको तीन दिनदेखि मनोनयन दर्ताको क्रम सुरु भएपनि हालसम्म उत्साहजनक ढंगले उम्मेदवारी दर्ता भएको छ । उम्मेदवारहरु अझै पनि आन्तरिक छलफलमा रहेको तथा टीमहरु मिलिनसकेकाले मनोनयन दर्ता गराउने क्रम सुस्त बनेको बताइएको छ ।

तीन दिनको अवधिमा जम्मा २४ जनाले मात्रै पूर्ण प्रक्रिया पुरा गरेर मनोयन दर्ता गराएको संघकी सञ्चार अधिकृत इन्द्रलक्ष्मी घिमिरेले जानकारी दिइन् ।

उनका अनुसार सोमबारसम्म मनोनयन दर्ताको समय रहेकाले यो दुई दिनमा मनोयन दर्ताको प्रक्रिया सबै सकिने छ । संघको मनोनयन दर्ताका लागि दुई जना समर्थक र प्रस्तावक अनिवार्य रुपमा चाहिन्छ । साथसाथै संघलाई तिर्नेगरी यसअघि घोषणा गरेको बक्यौदा रकम पनि बुझाइसकेको हुनुपर्नेछ । उम्मेदवार, प्रस्तावक र समर्थकको बक्यौता तिरेपनि मात्रै सबै प्रक्रिया पुरा हुने गरेको छ । साथै उम्मेदवार प्रस्ताव र समर्थक बस्न नमिल्ने प्रावधान समेत रहेको छ ।

संघको अध्यक्ष पदमा हालसम्म आरके शर्माले उम्मेदवारी दर्ता गराएका छन् । शुक्रबार बालुवाटारस्थित एनआरएनएको कार्यालयमा पुगेर उनले विधिवत रुपमा उम्मेदवारी दर्ता गराएका हुन् ।

उनको प्रस्तावकमा वेद खरेल र डीबी क्षेत्री रहेका छन् भने समर्थकमा रमेश भट्ट र बन्दना शर्मा (सापकोटा) रहेका छन् । उनलाई उम्मेदवारी दर्तालगत्तै अध्यक्षका प्रत्यासीद्वय बद्री केसी र महेश श्रेष्ठले शुभकामना दिएका छन् । शर्मालाई उम्मेदवारी दर्तापछि एनआरएनए मुख्यालयमै रहेका केसी र श्रेष्ठले शुभकामना दिएका हुन् । जसले एनआरएनएभित्र सौहार्दपूर्ण वातावरणमा चुनावी प्रक्रिया अघि बढिरहेको संकेत गर्ने अभियन्ताहरु बताउँछन् । अध्यक्षका प्रत्यासीद्वय केसी र श्रेष्ठले भने मनोनयन दर्ता गराइसकेका छैनन् ।

शर्मा उम्मेदवारी दर्ता गर्न उनको टीममा रहेका अन्य पदाधिकारीका उम्मेदवारहरु पनि सँगै थिए । तर, उम्मेदवारी भने शुक्रबार शर्माको मात्रै दर्ता गरिएको हो । शर्माको टीमका अन्य उम्मेदवारहरुले भने दर्ता भइरहेको छ। शुक्रबार नै पत्रकार सम्मेलन गरेर शर्माले आफूले मध्यपूर्वसहित संसारभरका एनआरएनएको हितका लागि काम गर्न अध्यक्षमा उम्मेदवारी दिएको बताएका थिए । उनले एनआरएनएलाई एकताबद्ध गर्नेसहितका एनआरएनएलाई सम्मानित बनाउने विभिन्न एजेण्डा अघि सारेका छन् । एक महिनामा एक बाचा पुरा गर्नेगरी २४ महिने कार्यकालमा गर्ने २४ कामको विवरणलाई उनले २४ बुँदे बाचापत्रमा समेटेका छन् ।

मध्यपूर्वबाट पहिलो पटक नेतृत्वमा दाबीसहित सशक्त उम्मेदवारी दिएका उनको पक्षमा राम्रो माहोल रहेको बताइएको छ ।

एनआरएनए निर्वाचनबाट अध्यक्षसहित ७४ जना पदाधिकारी निर्वाचित हुने व्यवस्था छ । जसअनुसार महाधिवेशनबाट अध्यक्षसहित उपाध्यक्ष ६, महिला उपाध्यक्ष १, युवा उपाध्यक्ष १, महासचिव १, उपमहासचिव २, सचिव ६, महिला सचिव १, कोषाध्यक्ष १, सहकोषाध्यक्ष ३, महिला सहकोषाध्यक्ष १ महिला संयोजक १ र युवा संयोजक १ जना निर्वाचित हुनेछन् ।

यसैगरी क्षेत्रीय संयोजक प्रत्येक क्षेत्रबाट १–१ जना गरी ६ जना, क्षेत्रीय उपसंयोजक १२ जना निर्वाचित हुनेछन् । जसमा अफ्रिका क्षेत्रबाट २ र अन्य क्षेत्रबाट ३ जनाका दरले निर्वाचित हुने विधानमा उल्लेख छ । यस्तै क्षेत्रीय महिला उपसंयोजक ६ जना, क्षेत्रीय महिला उपसंयोजक ६ जना, क्षेत्रीय युवा संयोजक ६ जना, क्षेत्रीय युवा उपसंयोजक पनि ६ जना निर्वाचित हुनेछ । संयोजक र उपसंयोजक उनीहरु सबै प्रत्येक क्षेत्रबाट १–१ जनागरी ६ जना निर्वाचित हुने भएका हुन् । यसैगरी दोस्रो पुस्ताका गैरआवासीय नेपाली संयोजक १ जना निर्वाचित हुने विधानमा व्यवस्था रहेको छ ।

सम्बन्धित समाचार

नेपाल र कतारबीच द्विपक्षीय समझदारीमा हस्ताक्षर

प्रधानमन्त्री र कतारी अमिरबीच द्विपक्षीय भेटवार्ता जारी

प्रधानमन्त्री र कतारी अमिरबीच भेटवार्ता शुरु

आरके शर्मा समूहद्वारा सर्वोच्चको फैसलाको स्वागत