तुलसीपुरमा थारुहरुको साझा सभाहल बन्ने

दीप संञ्चार कात्तिक ९, २०७६ गते १७:५६ मा प्रकाशित

निता चौधरी

तुलसीपुर, नमुना भुँइह्यार थान समिति तुलसीपुर ५ जबरपुरमा आज शनिबार थारुहरुको पहिचान झल्किने नमुना सांस्कृतिक सभा हल निर्माण सम्बन्धमा छलफल तथा तिहारको शुभकामना आदानप्रदान कार्यक्रम सम्पन्न भएको छ । उक्त कार्यक्रममा बोल्ने थारु अगुवाहरुले थारुहरुको पहिचान भनेकै भुँइह्यार थान भएकाले यसलाई संरक्षण गर्नुपर्ने बताए ।

तुलसीपुर क्षेत्रमा थारुहरुको पहिचान झल्किने थारु घर नभएको र थारुहरुको साझा सभाहल नभएकाले थारुहरुको कुनै कार्यक्रम, सभा वा गोष्ठी गर्ने भवन नहुँदा आइपर्ने समस्याको समाधान गर्ने उद्देश्यले निर्माण गर्न लागिएको अध्यक्ष रामशरण चौधरीले जानकारी दिए । थारुहरुको साझा सभा हल निर्माण गर्ने योजना सहितको छलफलमा बोल्ने विभिन्न गाउँका महटवा तथा थारु अगुवाहरुले उक्त सभाहल निर्माणका लागि व्यक्तिगत तथा सामुहिक रुपमा सहयोग गर्ने प्रतिबद्धता जनाए ।

उक्त सभाहल निर्माणका लागि नमुना भुँइह्यार थान समिति तुलसीपुरका अध्यक्ष रामशरण चौधरीले ५० हजार आर्थिक सहयोग गर्ने प्रतिबद्धता जनाए । अन्य गाउँका महटवाहरुले पनि प्रतिबद्धता जनाएको चौधरीले जानकारी दिएका छन् । समग्र थारुहरुको साझा सभाहल भएकाले तुलसीपुर उपमहानगरपालिका भित्र पर्ने सबै गाउँबाट आर्थिक रुपमा सहयोग गर्न पनि अध्यक्ष चौधरीले आग्रह गरेका छन् । करिब करिब ६० लाखको लागतमा करिब ५ सय जना सहभागी अट्ने खालको सभाहल निर्माण गरिने गरी छलफल भइरहेको जानकारी दिए ।

आगामी मंसिरदेखि सभाहलको निर्माण सुरु गर्ने गरी आफूहरु लागिरहेको उनको भनाई छ । संधीय सांसद हिराचन्द्र केसीले करिब ३०/३५ लाख सहयोग गर्ने प्रतिबद्धता जाहेर गरेपछि आफ्नो हौसला बढेको र सभा हल निर्माणका लागि लागिपरेको बताए । नमुना भुइह्यार थान समिति तुलसीपुरका अध्यक्ष रामशरण चौधरीको अध्यक्षतामा भएको कार्यक्रममा थारु बृद्धिजीवी रोहित थारु, छोटीलाल थारु, बुझौना थारु, गजेन्द्र बहादुर चौधरी लगायतले मन्तब्य राखेका थिए ।

नमुना भुँइह्यार थान समिति तुलसीपुरले स्थापना कालदेखि गर्दै आएको गतिविधिका बारेमा प्रगतिप्रतिवेदन समितिका अध्यक्ष रामशरण चौधरीले प्रस्तुत गरेका थिए । विभिन्न गाउँका महटवा र थारुअगुवाहरु गरी ५० जनाको सहभागिता रहेका छलफल कार्यक्रमको सहजीकरण उपाध्यक्ष नारायण चौधरीले गरेका थिए ।

क्याटेगोरी : प्रदेश ५