कुवेतमा कार्यरत नेपालीको सेवा गरिरहेकी थिइन्, क्यान्सरसँग लड्दा–लड्दै कोमामै अस्ताइन्

कुवेत – कुवेतस्थित नेपाली राजदूताबासमा कार्यरत श्रम सहचारी विपना ज्ञवालीको निधन भएको छ। रगतको क्यान्सरका कारण ज्ञवालीको शुक्रबार निधन भएको हो।

रक्त क्यान्सरको कारणले अल्पायुमै ज्यान गुमाएकी कुवेतका लागि नेपाली श्रम सहचारी ज्ञवालीको पार्थिव शरीर आइतबार नेपाल ल्याएर अन्त्येष्टि गरिएको छ। कुवेतको जजिरा एयरलाइन्समार्फत् शव पठाइएको हो।

२८ वर्षीया ज्ञवाली अर्घाखाँची चिदिकाकी हुन्। अविवाहित ज्ञवाली लामो समयदेखि क्यान्सर रोगसँग जुधिरहेकी थिइन्। तर, अघिल्लो बुधबारदेखि ज्ञवालीको अवस्था निकै गम्भीर भएको थियो।

स्वास्थ्यमा सुधार नभएपछि शुरुमा ज्ञवालीले नेपाली दूताबास नजिकै रहेको मुभारक अल काबीर अस्पतालमा कोरोना भाइरस (कोभिड–१९) परिक्षण गराएकी थिइन्। परीक्षणमा रिपोर्ट नेगेटिभ आए पनि उनलाई राहत भएन।

त्यसपछि उनलाई मुवारक अस्पतालले शेख अल वर्दिस क्यान्सर अस्पतालमा रिफर गरेर पठायो। कुवेतमा उनलाई भेट्न गएका दाइ निरञ्जन ज्ञवाली र दिदी सपना ज्ञवालीसहित परिवारका सदस्य भए पनि उनको बसाइ एक्लै थियोे।

तीन महिनाअघि उनीसँगै कुवेत गएकी उनकी आमा गत शुक्रबार बिहान मात्र नेपाल फर्केकी हुन्। छोरीको आइसियूमा भर्ना भए पनि उपचारमा अपेक्षित सफलता नभएपछि आमा पनि बस्न नसकेर नेपाल फर्केकी थिइन्।

आमा नेपाल फर्केकै समय ज्ञवालीको निधन भएको हो। लकडाउनको समयमा भएको प्रतिस्पर्धामा श्रम सहचारीमा छनोट भएकी ज्ञवाली तत्कालीन श्रम सहचारी ज्ञानेन्द्र शर्मा नेपाल फर्केको दिन नै कार्यस्थल कुवेत आएकी थिइन्।

श्रम सहचारी ज्ञवालीको निधनप्रति राजदूतावासले दुःख व्यक्त गरेको छ। राजदूत दुर्गाप्रसाद भण्डारीले एक कर्मठ र लगनशील राष्ट्रसेवक गुमाएको बताउँदै शोकको यस घडीमा ज्ञवालीका सम्पूर्ण शोकसन्तप्त परिवार प्रति गहिरो समवेदना प्रकट गरेका छन्।

सम्बन्धित समाचार

पत्रकार सम्मेलन मार्फत एनआरएनए साउदीले गर्यो घोटाला आरोपको घोर भत्सर्ना…

आइसीसीको निर्देशन अनुसार खाता खोलिएको हो: कोइराला (भिडियो सहित)

तनहुँ समाज कतार द्वारा शिशुको उपचारमा आर्थिक सहयोग प्रदान

भ्रस्टाचारको आरोपमा एनआरएन युएइका अध्यक्ष कोईराला र उपाध्यक्ष शेर्पा निलम्बित,…