कतार,गैरआवासीय नेपाली संघ(एनआरएनए)को आगामी महाधिबेशनका लागि कतारबाट युवा उपाध्यक्ष राजु रेग्मी ‘राज’ले आइसीसी उपाध्यक्षमा उम्मेदवारी घोषणा गरेका छन ।
कतारको दोहामा अध्यक्षका उम्मेदवार आरके शर्माको उम्मेदवारी घोषणा कार्यक्रममा रेग्मीले आफ्नो उम्मेदवारी घोषणा गरेका हुन । यूरोप भ्रमणमा रहेकाले जुममार्फत जोडिएका रेग्मीले कर्मथलोमा उम्मेदवारी घोषणा कार्यक्रम हुँदा प्रत्यक्ष सहभागी हुन नपाए पनि साथ, सहयोग र समर्थन रहने प्रतिवद्धता जनाए ।
कतारबाट आरके शर्माले अध्यक्षमा औपचारिक उम्मेदवारी घोषणा गर्दा मध्यपुर्वका एनआरएनए अगुवा तथा अधिकांश एनसीसीको बाक्लो उपस्थिति रहेको थियो । सो अवसरमा रेग्मीले भने–‘ उम्मेदवारी घोषणा गर्नु भएका सबैलाई सफलताको शुभकामना दिदै आफुले आइसीसी उपाध्यक्षमा उम्मेदवारी घोषणा गरेको सार्वजनिक गरे ।’
विगत २ दशकदेखि कतारलाई आफ्नो कर्मभूमि बनाउँदै आएका युवा व्यवसायी रेग्मी एनआरएन अभियानमा उदयमान तथा उर्जाशिल व्यक्तिका रुपमा चिनिन्छन । एनआरएनए अभियानको यात्रालाई निरन्तरता दिदै रेग्मीले आगामी कार्यकाल २०२३–२५ का लागि उपाध्यक्षमा उम्मेदवारी दिएका हुन ।
‘विशेष गरेर मध्यपूर्व वा श्रमिकको मुलुकबाट पनि एनआरएनएमा चासो राख्ने, राम्रो लिडरशिप गर्न सक्ने क्षमताका व्यक्तित्व पनि छन् भन्ने देखाउनुपर्ने अवस्था आएको छ,’ रेग्मीले भनेका छन् ।
राज यसअघि एनआरएनए आइसीसी मध्यपूर्वका युवा संयोजक, एनआरएनए अन्तर्राष्ट्रिय समन्वय परिषदका युवा उपाध्यक्ष र विभिन्न टास्क फोर्सका संयोजक भइसकेका व्यक्ति हुन् ।
उनले एनआरएनएलाई एक सुढृढ, सफल र सक्षम संस्थाको रुपमा विकास गर्ने दृढ संकल्प बोकेका छन् । जसको लागि उनले केहि एजेण्डाहरु अघि सारेका छन् । एनआरएनएमा सबैको अपनत्व बोध गराई युवा पुस्ताको मुद्दा स्थापित गराउने, एनआरएनएमा पद्दति र पारदर्शिता बढाउने, एनआरएनएमा दोस्रो पुस्ताका नेपालीलाई आकर्षित गर्ने, एनआरएनएका सीप, स्रोत र दक्षतालाई नेपालमै प्रयोग गर्ने वातावरण बनाउने र नेपालमा पर्यटन प्रवद्र्धनसँगै सुरक्षित लगानी मैत्री वातावरण निर्माणका लागि सहयोग गर्ने लगायत उनका लोकप्रिय नारा हुन् ।
उम्मेदवारी घोषणासँगै उनले सामूहिक लगानीमा युवाहरुको सहभागिता, युवा स्वरोजगार, सीप र पूँजीको व्यवस्थापन, सुरक्षित र मर्यादित वैदेशिक रोजगारी, राहत कोष स्थापना, नेपाली कला सँस्कृतिको जगेर्ना, मतदानका लागि पहल गर्ने, स्मार्ट र वैज्ञानिक एनआरएनए बनाउने लगायतका प्रतिवद्धता जनाएका छन् ।
उनले थपेका छन्, ‘नेपालको सम्भाव्य क्षेत्रको पहिचान गरी गैरआवासीय नेपाली संघको अभियान मार्फत सामुहिक लगानी गरेर छिटो भन्दा छिटो हाम्रो देशलाई समृद्ध बनाउनु छ । त्यो नै मेरो मुख्य एजेन्डा हो ।’
दोश्रो पुस्तालाई एनआरएनसँग जोड्ने ग्लोवल एनआरएन सिंगिङ आइडलका परिकल्पनाकार समेत रहेका राज गैर आवासीय नेपाली संघका राइजिङ्ग स्टार जस्ता देखिएका छन् ।
क्याटेगोरी : ग्लोबल, गल्फट्याग : #breaking,
#NRNA
