संसद विघटनको सिफारिश फिर्ता गर – विवेकशील साझा पार्टी प्रवास

दीप संञ्चार पुस ८, २०७७ गते २:०१ मा प्रकाशित

दोहा – विवेकशील साझा पार्टी प्रवासले प्रधानमन्त्रि केपी शर्मा ओलीले संसद विघटनको लागि चालेको कदमलाई असंवैधानिक भन्दै तत्काल फिर्ता गर्न आग्रह गरेको छ।

प्रवासले कतार स्थित नेपाली राजदूतावास मार्फत नेपाल सरकार मन्त्रीपरिषद तथा प्रधानमन्त्रीको कार्यालयलाई एक ज्ञापन पत्र मार्फत यस्तो आग्रह गरेको हो।

विवेकशील साझा पार्टी प्रवासका केन्द्रि सदस्य सुरेश भट्ट आश्रिन द्वारा हस्ताक्षर गरिएको पत्रमा भनिएको छ, “प्रधानमन्त्री केपी ओलीले अनायास संसद विघटनको सिफारिश गर्नु असंवैधानिक, अलोकतान्त्रिक र तानाशाही कदम र संविधानमाथिको स्पष्ट ‘कू’ भएको ठहर गर्दै हामी प्रवासमा रहेका नेपालीहरुका तर्फबाट यो कदमबाट पछि हट्न अनुरोध गर्दछौँ ।”

श्रमिक नेपालीको पिडामा बेखबर रहेको सरकारले यस्ता जनविरोधी काम गर्नू भनेको कर्तव्य विमुखको पराकाष्ठा भएको दाबि गर्दै पत्रमा नेपालको संविधान २०७२ ले प्रधानमन्त्रीलाई संसद विघटनको ‘विशेषाधिकार’ प्रदान नगरेको तथा संसदबाटै वैकल्पिक सरकार निर्माण गर्ने अधिकार संसदलाई हुँदाहुँदै निहित स्वार्थपूर्तिका लागि कुण्ठा र अहंग्रस्त कदम चालेर प्रधानमन्त्री र राष्ट्रपतिले देशमाथी घात गरेको ठहर गरिएको समेत उल्लेख गरिएको छ।

उक्त ज्ञापन पत्रमा पटकपटक सर्वोच्च अदालतबाट विदेशमारहेका नेपाली नागरिकलाई मतदानको अधिकारको व्यवस्था गर्न गरेको आदेश समेत पालना नगरेको तथा कोरोनाकालमा समेत प्रवासमा रहेका प्रवासीलाई वेवास्ता गरेको आरोप लगाउंदै यस पछिल्लो कदमले प्रवास रहेका लाखौँ श्रमजीवी नेपालीको मन कुँडिएको कुरा उल्लेख गरेको छ।