आरके शर्माको पक्षमा श्रमिकहरू एकजुट, आन्तरिक सर्कुलर गरिए नमान्ने

गैरआवासीय नेपाली संघ (एनआरएनए) को अध्यक्ष पदका उम्मेदवार आरके शर्मालाई मध्यपूर्व र त्यसबाहिर विश्वभरका श्रमिक डेलिगेट्सहरुले समर्थन गरेका छन् । यस्तै कांग्रेस निकट जनसम्पर्क समितिका कतिपय अभियन्ताहरुले समेत शर्माकै पक्षमा तीव्र लबिङ गरिरहेका छन् ।

पहिलो पटक मध्यपूर्वलाई नेतृत्व दिनुपर्ने भन्दै डेलिगेट्सहरुले तीव्र लबिङ गरिरहेका हुन् । शर्माको पक्षमा महाधिवेशनस्थल होटल सोल्टी क्षेत्रमा समेत चहलपहल र लबिङ भइरहेको देखिन्छ । जसका कारण आरकेको पक्षमा राम्रो महोल देखिएको छ ।

श्रमिकको प्रतिनिधित्व गर्ने देश कतारको उम्मेदवार आरके शर्मा भएकाले यो निर्वाचनमा फरक खालको दृश्य देखिएको एनआरएनए अभियन्ताहरू बताउँछन् । ‘एक हिसाबले भन्ने हो भने एनआरएनएको चुनावमा संसारभरका श्रमिक वर्ग पार्टीभन्दा माथि उठेको देखिन्छ’ ती अभियन्ताले भने । अर्का अभियन्ताले राजनीतिक पार्टीले कसैको नाममा सर्कुलर जारी गरे पनि त्यो नमान्ने ठाउँमा श्रमिकहरू पुगेको बताए ।

यसबारे सर्कुलर गरिएमा त्यसलाई नमान्ने कतारसहितका कतिपय देशका राजनीतिक दलका शुभेच्छुक सङ्गठनले पार्टीलाई बताइसकेका छन् । उनीहरूले आरकेको टिम राजनीतिक, जातीय, क्षेत्रीय भेगीय सबै हिसाबले समावेशी टिम भएकाले उनलाई निर्वाचित गराउन लागिपर्ने बताएका छन् । शर्माले आफूलाई सबै राजनीतिक दलहरूको सहयोग रहेको बताएका छन् ।

कांग्रेसबाट महेश श्रेष्ठ र एमालेबाट बद्री केसी उम्मेदवार भए पनि शर्मालाई एमाले र कांग्रेसभित्रकै ठुलो पंक्तिको साथ रहेको छ । जसको उदाहरण शर्माको टिममा रहेका राज रेग्मी, शशिकान्त पौडेल, प्रवीन गुरुङ, मनोज श्रेष्ठसहितका उम्मेदवार रहेको अभियन्ताहरूको भनाइ छ ।

शर्मालाई माओवादी निकट भनिएपनि उनको टिममा कांग्रेस निकटका ६० प्रतिशत भन्दा बढी उम्मेदवार रहेको बताइएको छ ।
उसो त कांग्रेसका उम्मेदवारहरु चारतिर बाँडिएका छन् । जसका कारण कांग्रेसलाई टाउको दुखाइको विषय बनेको अभियन्ताहरू बताउँछन् ।

सम्बन्धित समाचार

प्रवासी भुजेल समाज कतारको आठाै महाधिवेशन सप्पन्न

नेपाल व्यवसायी सङ्घ कतारको दोस्रो वार्षिक साधारण सभा तथा स्मारिका…

कतार आइपुगे पूर्व परराष्ट्र मन्त्री महत । 

एनआरएन अध्यक्ष श्रेष्ठ र एफएनसीसीआई अध्यक्ष ढकालबीच ‘एनआरएन इन्भेस्टमेन्ट समिटबारे…