काठमाडौँ क्षेत्र नं १ बाट सिंह बिजयी, मिश्र फेरि पनि पराजित

काठमाडौं – नेपाली कांग्रेसका नेता प्रकाशमान सिंहले काठमाडौँ क्षेत्र नं १ बाट लगातार दोस्रो पटक रविन्द्र मिश्रलाई पराजित गरेका छन ।

सोही क्षेत्रबाट लगातार चौथो पटक विजयी भएका सिंह अघिल्लो निर्वाचन २०७४ सालमा पनि मिश्रलाई नै पराजित गरेका थिए ।

सिंहले यस निर्वाचनमा सात हजार एक सय ४० मत ल्याएर विजयी भएका हुन । सिंहले उनका प्रतिस्पर्धी मिश्रभन्दा एक सय २९ मतले अगाडि रहँदै निर्वाचित भएका छन । मिश्रले सात हजार ११ मत ल्याएका थिए ।

प्रजातन्त्रका योद्धा तथा २०४६ सालको जनआन्दोलनका सर्वोच्च कमाण्डर लौहपुरुष गणेशमान सिंहका छोरा सिंहले बुबाको राजनीतिक विरासतलाई कायम राख्दै आएका छन् । सिंह यसअघि २०६४, २०७० र २०७४ को निर्वाचनमा सोही क्षेत्रबाट निर्वाचित भएका थिए ।

कांग्रेसको साधारण सदस्य हुँदै राजनीतिमा प्रवेश गरेका सिंह नेपाली कांग्रेसको काठमाडौं जिल्ला सभापति, केन्द्रीय सदस्य, महामन्त्री र उपसभापतिसम्मको जिम्मेवारी निर्वाह गरिसकेका छन । कांग्रेसका शीर्ष नेता मध्येका एक सिंह तत्कालीन सुशील कोइरालाको सरकारमा उपप्रधानमन्त्री तथा स्थानीय विकास तथा सङ्घीय मामिलामन्त्री भएका थिए ।

विसं २०१२ मा काठमाडौँको क्षेत्रपाटीमा जन्मिएका सिंहले स्नातकोत्तर तहसम्मको अध्ययन गरेका छन।

सिंह २०३६ सालमा नेपाल विद्यार्थी सङ्घको सभापति हुँदै केन्द्रीय राजनीतिमा सक्रिय भूमिकामा रहेका छन । सरल व्यक्तित्व भएका सिंह आफ्नो निर्वाचन क्षेत्रमा निरन्तर खटिएर जनताको सुख दुःखमा साथ दिने नेतामा पर्दछन ।

क्याटेगोरी : राजनीति
ट्याग : #breaking, #Election, #hot, #निर्वाचन २०७९, #नेपाली कांग्रेस, #प्रतिनिधिसभा र प्रदेशसभा निर्वाचन

---

---

---