प्रचण्डको गृह जिल्लामै एमसीसी सम्झौता जलाइयो

काठमाडौँ –

नेकपा माओवादी केन्द्रका अध्यक्ष पुष्पकमल दाहाल प्रचण्डको गृहजिल्ला चितवनमा एमसीसी सम्झौता जलाइएको छ। एमसीसी खारेजी संघर्ष समितिले मंगलबार एमसीसी सम्झौता जलाएको हो।

भरतपुरको नारायणगढ बजारस्थित लायन्सचोकमा एक कार्यक्रम गर्दै एमसीसीविरुद्ध विरोध तथा प्रदर्शन गर्दै संघर्ष समितिले एमसीसी सम्झौता जलाएको हो। राष्ट्रघाती सम्झौता हुन नदिन दबाब दिने उद्देश्यका साथ विरोध तथा प्रदर्शन कार्यक्रम गरेको आयोजक एमसीसी खारेजी संघर्ष समितिले जानकारी दिएको छ।

मंगलबार युवा संगठन वाईसिएलको कार्यक्रममा माओवादी अध्यक्ष प्रचण्डले एमसीसी सम्झौता पास नहुने घोषणा गरेका थिए। नेपालले एमसीसी सम्झौताबारे अमेरिकालाई सोधिएको प्रश्नको जवाफ नआएका कारण एमसीसी सम्झौता पास नहुने बताउँदै ढुक्क भएर बस्न भनेका थिए।

उता नेपाली कांग्रेसको संसदीय दलको बैठकमा प्रधानमन्त्री शेरबहादुर देउवाले एमसीसीका बारेमा अफवाह नफैलाउन सांसदहरुलाई निर्देशन दिएका छन्। बुधबारको संसद बैठकमा सबै सांसदलाई उपस्थित हुन पनि उनले निर्देशन दिए। सत्ता साझेदारका दुई शीर्ष दलका शीर्ष नेताले एमसीसीका विषयमा फरकफरक अभिव्यक्ति दिएपछि सत्ता गठबन्धनमा खैलाबैला मच्चिएको छ।

यसैबीच एमसीसीकी उपाध्यक्ष नेपाल आइपुगेकी छिन्। उनी नेपाल आउने समाचार आएसँगै नेपालमा एमसीसीविरुद्धको प्रदर्शनले तीव्रता पाएको छ। देशैभर विरोध तथा प्रदर्शनका कार्यक्रमहरु भएका छन्। केही प्रदर्शनकारीलाई प्रहरीले पक्राउ गरेको छ।

सम्बन्धित समाचार

कांग्रेस महाधिवेशनमा शिक्षक र कर्मचारीलाई प्रतिनिधि नबनाउन उच्च अदालतको अल्पकालीन…

यी हुन् देउवा सरकारका २५ मन्त्री, राष्ट्रपति कार्यालयबाट पायो आधिकारिकता…

रामकुमारी र खतिवडाको मन्त्रालय हेरफेर, किन खोसियो स्वास्थ्य मन्त्रालय ?

जसपाले टुंग्यायो मन्त्रीको नाम, यी ४ नेता फाइनल