९० वर्षीया ब्रिटिश महिला किननलाई पहिलो कोरोना बिरुद्ध खोप

बेलायत (जीएनएन) -९० वर्षीया ब्रिटिश महिला मार्गारेट कीननलाई खोप लगाएर यूकेमा देशव्यापी कोरोनाभाइरस विरुद्धको खोप अभियान शुरु गरिएको छ । उनलाई स्थानीय समयअनुसार मंगलबार बिहान ६ बजेर ३१ मिनेटमा वरिष्ठ नर्स मे पर्सन्सले कोभेन्ट्रीस्थित युनिभर्सिटी हस्पिटलमा खोप लगाई दिएकी थिइन्।

म्यागी पनि भनेर चिनिने कीननले कोभिड-१९ विरुद्धको खोप लगाउने पहिलो व्यक्ति हुन पाउँदा आफूलाई भाग्यमानी सम्झेको बताइन् । “मेरो लागि यो सबैभन्दा राम्रो जन्मदिनको उपहार हो, ” उनले भनिन्। उनी आउँदो साता ९१ वर्ष पुग्दै छिन्। उनलाई फाइजर/बायोएनटेकले विकास गरेको खोप दिइएको थियो। मंगलबार बिहान बीबीसीसंग कुरा गर्दै युकेका स्वास्थ्य मंत्री म्याट ह्यानककले ब्रिटेनमा खोप शुरु गर्न पाउंदा आफु भावविभोर भएको बताए। उनले क्रिसमस भन्दा अगावै लाखौं ब्रिटिश नागरिकहरुलाई खोप लगाउने योजना भएको बताए।

यूकेले सो खोपको चार करोड मात्रा किन्न फाइजरसँग सहमति गरेको छ। शुरुमा ८० वर्षभन्दा माथिका र स्वास्थ्यकर्मीहरूलाई यो खोप दिइने बताइएको छ । करिब २० करोड मानिसलाई लगाइने खोपको पहिलो चरण अस्पतालहरुमा पुर्‍याएसँगै क्रमश: वितरण गर्ने बेलायतको तयारी छ । यो खोपको प्रयोगसँगै अस्पताल भर्ना हुन आउने कोरोनाका बिरामीहरूको संख्या ९९ प्रतिशतसम्म कम हुने बेलायती सरकारी अधिकारीहरुको दावी छ ।

फाइजर तथा बायोएनटेक कम्पनीहरुले विकास गरेको उक्त खोप बेल्जियममा उत्पादन गरिएको हो। जीएनएनसंग कुरा गर्दै बेलायतको बर्मिङ्घम विश्वविद्यालयमा औषधि विज्ञानका सहप्राध्यापक डा. विभु पौड्यालले ब्रिटेनभरि सबै जनतालाई खोप लगाउन अझै ७, ८ महिना लाग्न सक्ने जनाए। तर यो बीचमा खोपबाट नकारात्मक असर परेमा समय अलि लम्बिन सक्ने उनले बताए। ब्रिटेनमा कोभिड १९ का कारण ६४ हजार भन्दा बढी नागरिकहरुको निधन भैसकेको छ।

सम्बन्धित समाचार

२० वर्ष पुगेर विवाह गर्ने किशोरीलाई वडाले पैसा दिने

कतार व्यवसायी संघको ऎतिहासिक सफलता, कतारका व्यवसायीलाई श्रम स्वीकृती नचाहिँने

विद्यार्थीको आन्दोलन चर्किएपछि धनगढीमा २४ घण्टे निषेधाज्ञा जारी

अतिक्रमण गरेर बनाइएका संरचना ३५ दिनभित्र हटाऊन उपत्यका विकास प्राधिकरणको…