Techie IT
×
जम्मा संक्रमित (नेपाल)
निको भएको
मृत्यु
जम्मा संक्रमित (विश्व)
गृहपृष्ठप्रदेश खबरप्रदेश ५तत्कालीन वेष्टर्न डेभलमेन्ट बैँक नारायणपुर शाखाबाट १८ करोड रुपैयाँ हिनामिना प्रकरण

तत्कालीन वेष्टर्न डेभलमेन्ट बैँक नारायणपुर शाखाबाट १८ करोड रुपैयाँ हिनामिना प्रकरण


दाङ्ग – तत्कालीन वेष्टर्न डेभलमेन्ट बैँक नारायणपुर शाखाबाट १८ करोड रुपैयाँ हिनामिना भएको मुद्दाका अभियुक्तमध्ये ठुला बैंक सन्चालक, सिइओ र सहायक सिइओ सबैलाई अदालतले धरौटिमा छाडेको छ ।

बेष्टर्न बैंक देब बिकास हुदै अहिले कुमारी बैंकमा मर्ज भइसकेको छ । बैंक हिनामिनाका अभियुक्तमध्ये ६ जना बैंक सन्चालकहरु जनही १२ लाख धरौटीमा छुटिसकेका छन् भने बैंकका सिइओ र सहायक सिइओ पनि धरौटिमा छुटेका छन् । १२ लाख धरौटिमा छुटेर मुद्धा खेपिरहेकाहरुमा बैंक सञ्चालक समितिका अध्यक्ष ओमभक्त बुढाथोकी, बैँक सञ्चालक समितिका सदस्यहरु खड्ग बुढाथोकी, अर्जुन बुढाथोकी, निर्मल देवकोटा, वेगम बहादुर भण्डारी, शेषमणि गौतम रहेका छन ।

बैंकका सिइओ खिमबहादुर डिसी उच्च अदालतबाट ३० लाख धरौटि राखेर छुटेको र पुर्पक्षमा रहेका बैंकका सहायक सिइओ तथा कर्जा विभाग प्रमुख अनिलकुमार न्यौपाने सर्बोच्च अदालतबाट ५० लाख धरौटि टागेर छुटेका अदालतका शाखा अधिकृत गोकर्ण वलीले जानकारी दिए । प्रहरीको अनुसन्धानको शिलशिलामा ६ जना बैंक सन्चालकहरु र सिइओ डिसी सहित खातावालहरु लामो समय फरार रहे । सहायक सिइओसहित केहि खातावाललाइ भने प्रहरीले अनुसन्धानको शिलशिलामा नियन्त्रणमा लिएर मुद्धा चलायो ।

प्रहरीले बैंकको १८ करोड हिनामिना प्रकरणमा यसअघि नै दुई महिना लाामो अनुसन्धानपछि सरकारी वकिल कार्यालयमा बुझाएको थियो । सरकारी वकिल कार्यालयले गएको कात्तिक ३ गते उक्त मुद्दा उच्च अदालत तुलसीपुरमा दायर गरेको थियो । मुद्दा दायर गर्दा बैंक सञ्चालक समिति अध्यक्ष र सञ्चालक समिती सदस्य, सिइओ फरार सूचीमा थिए । त्यसपछि अदालतले उनीहरूको घरमा म्याद टाँसेको थियो । बैंकको १८ करोड हिनामिना प्रकरणमा ६ जना बैंक सञ्चालक, सिइओ, कर्मचारी,ऋणी, खातावाल गरेर ५६ जनाविरुद्ध मुद्दा छ ।

यसअघि नै पक्रा परेकामध्ये बैंकका म्यानेजर समिर बुढाथोकी , मनोज केसि पुर्पक्षका लागि कारागार चलान भइसकेका छन । केसीले २ करोड ८ लाख २३ हजार ४ सय ९२ धरौटि तिर्न नसकेपछि कारागार चलान भएका हुन । त्यस्तै खातावालहरु बिजय कुमार गुप्ता १ करोड २२ लाख ६५ हजार, झगबहादुर डिसी १ करोड १९ लाख ५० हजार, बसन्त बहादुर बस्नेत ४ करोड ३० लाख ७२ हजार ५ सय सर्बोच्च अदालतबाट धरौटि तिरेर छुटेका छन ।

खाताको रकम दुरुपयोग गरेकोमा रबिन कुमार डाँगी ३५ लाख ५१ हजार रुपैया, ऋण सहायक पोषण प्रसाद जैसि, बिरेन्द्र कुमार गुप्ता २०÷२० लाख, अर्जुन बस्नेत २७ लाख रुपैया उच्च अदालत तुलसिपुरबाट धरौटि राखेर छुटेका छन । १८ करोड हिनामिना प्रकरणमा संलग्न भएको आरोप लागेकामध्ये बैंकका सिइओ, सञ्चालक समितिका अन्य पदाधिकारी, बैंक ऋण बोर्ड सदस्यहरू फरार भएर सिधै अदालतमा हाजिर भएका थिए ।

बैंकको रकम हिनामीनामा मुछिएका धेरैजसो खातावाल, बैंकका कर्मचारी र बैंक सन्चालक,सिइओ, सहायक सिइओ सबै छुटिसकेका छन । अदालतका शाखा अधिकृत वलिले सक्टुराम गुप्ता, बन्दना गुप्ता, अर्चना थापा खत्री, बसन्त बहादुर बुढाथोकी, लेखा परिक्षक प्रेम भुर्तेल साधारण तारीखमा रिहा भइसकेको जानकारी दिए ।

उनका अनुसार दुइ जना प्रतिबादी मात्र अदालतमा हाजीर भएका छैनन् । म्याद बुझेर हाजीर नहुनेमा यज्ञ वली र मदन डिसी रहेका छन । बैंक घोटालामा संलग्नमध्ये बैंक सञ्चालक, सिइओ लगाएको सम्पत्ति छानबिन गर्न मागसहित सम्पत्ति शुद्धिकरण विभागमा मुद्दा समेत परेको छ ।


क्याटेगोरी : समाचार, प्रदेश ५
ट्याग : #breaking

तपाईको प्रतिक्रिया दिनुहोस