Techie IT
×
जम्मा संक्रमित (नेपाल)
निको भएको
मृत्यु
जम्मा संक्रमित (विश्व)
गृहपृष्ठसमाचारप्रहरीको महानिरीक्षकमा शैलेश थापा क्षेत्री नियुक्त, भन्छन ‘एकलौटी निर्णय गरेर अगाडि बढ्दिन’

प्रहरीको महानिरीक्षकमा शैलेश थापा क्षेत्री नियुक्त, भन्छन ‘एकलौटी निर्णय गरेर अगाडि बढ्दिन’


काठमाडौं – नेपाल प्रहरीको महानिरीक्षक (आईजीपी)मा बढुवा भएका प्रहरी अतिरिक्त महानिरीक्षक (एआईजी) शैलेश थापा क्षत्री संगठनमा इमान्दार र शालिन स्वभावका अधिकृतका रुपमा चिनिन्छन् ।

भक्तपुरको कटुन्जेका थापा २०२५ साल मंसिर २३ गते जन्मिएका हुन् । २०४९ वैशाख १९ गते प्रहरी सेवामा प्रवेश गरेका थापाका बुबा शम्भु थापा पूर्वप्रहरी नायब महानिरीक्षक (डीआईजी) हुन् ।

थापा २०५८ मा डीएसपी, २०६७ मा एसपी, २०७४ मा एसएसपी र २०७५ सालमा डीआईजीमा बढुवा भएका थिए । त्यस्तै २०७६ फागुन १५ गते दोस्रो नम्बरमा एआईजी बढुवा भएका थिए ।

२८ औं आईजीपीमा नियुक्त भएका थापाले प्रहरी सेवाको लामो समय प्रहरी प्रधान कार्यालय र प्रहरी प्रशिक्षण प्रतिष्ठान (एकेडेमी) मा काम गरेका थापा नरम मिजासका प्रहरी अधिकारी हुन् ।

नीतिगत निर्णय गर्न रुचाउने थापा शिष्ठ शालिन प्रहरी अधिकारीको पहिचान बनाएका व्यक्तित्व हुन् । एआईजी बढुवा हुनुपूर्व थापा महानगरीय प्रहरी कार्यालयको प्रमुखको रूपमा कार्यरत थिए ।

एआईजी बढुवामा एक नम्बर रहेका थापासँग फिल्डमा कम काम गरेको, कमाण्ड कन्ट्रोलमा कमजोर क्षमता रहेको बताइन्छ । थापा बोस्निया, पूर्वी टिमोर र सुडान मिसनमा पनि गएका छन् ।

उनले इन्स्पेक्टर, डीएसपी, एसपी, एसएसपी र डीआईजी हुँदा एकेडेमी र सचिवालयमा काम गरेका छन् । इन्स्पेक्टर हुँदा उनले सल्यान, सिन्धुपाल्चोकमा काम गरेका छन् ।

त्यस्तै डीएसपी हुँदा थापाले जिल्ला प्रहरी कार्यालय, धादिङको कमाण्ड सम्हाले भने एसपी हुँदा कास्की र झापाको कमाण्ड सम्हाले ।

एसपी हुँदै उनी प्रहरी एकडेमी, विशेष ब्युरो र सचिवालयमा पनि बसे । एसएसपी भएपछि प्रहरी प्रधान कार्यालयको प्रवक्ता भए । त्यस्तै डीआईजीमा पनि थापा प्रहरी प्रधान कार्यालयको प्रवक्ता भएका थिए ।

एआईजी हुँदा मानव स्रोत एवं प्रशासन विभागको नेतृत्व सम्हालेका थापामाथि पछिल्लो समय प्रहरी बढुवामा न्याय गर्न नसकेको आरोप समेत लाग्यो । प्रहरीको पछिल्लो बढुवामा रोलक्रम मिचेर कनिष्ठ तथा विवादास्पद प्रहरी अधिकारीको

बढुवा निस्केसँगै निवर्तमान आईजीपी ज्ञवाली र थापामाथि संगठनमा न्याय गर्न नसकेको पनि केहीको आरोप छ ।

चुनौती के–के ?
नवनियुक्त प्रहरी आईजीपी थापाले संक्षिप्त कुरा गर्दै कानून कार्यान्वयमा दत्तचित्त भएर प्रहरी सङ्गठनलाई अगाडि बढाउने बताए । ‘नेपाल प्रहरीले गर्ने भनेको, गृह मन्त्रालयको नीति तथा कार्यक्रम लागू गर्ने हो, त्यसमा कुनै कसर बाँकी रहने छैन,’ थापाले भने ।

आईजीपीको मात्र होइन, प्रहरी हेडक्वार्टरको सामूहिक निर्णयबाट संगठन चलाउन सके कार्यकाल सफल हुने थापाको बुझाइ छ । थापा भन्छन्, ‘एकलौटी निर्णय गरेर अगाडि बढ्दिन ।’

अहिले प्रहरीमा नेतृत्व परिवर्तन हुँदैपिच्छे नयाँ सांगठानिक प्राथमिकता ल्याउने गरिएको छ । थापाले २२ महिने कार्यकालका लागि कसरी प्राथमिकता र कार्ययोजना तय गर्छन् भन्ने त्यो हेर्न बाँकी छ ।

साढे ३३ किलो सुनकाण्डदेखि निर्मला हत्या प्रकरणसम्ममा अनुसन्धान अधिकृत नै आरोपित बनेका छन् । यो स्थितिमा प्रहरीको गिरेको मनोबल उकास्नुपर्ने चुनौति पनि थापासामू छ ।

इमान्दार छविका आईजीपी थापाले अब आफ्नो कार्यकाललाई सरुवा–बढुवामा मात्र सीमित राख्छन् वा सम्झनलायक व्यवसायीक काम गरेर घर जान्छन् भन्ने चाहिँनिकट भविश्यले बताउला ।


क्याटेगोरी : समाचार
ट्याग : #breaking

तपाईको प्रतिक्रिया दिनुहोस