चीनसँगको सीमा समस्याबारे अध्ययन गर्न समिति बनाउने सरकारको निर्णय

काठमाडौँ – नेपाल र छिमेकी मुलुक चीनको सीमा विवाद पनि बेलाबेला सहतमा आउने गरेको छ। सीमा विवादका विषयमा संसदमै पनि पटकपटक प्रश्न उठ्ने गरेको छ।

केही समयअघि नेपाली कांग्रेसको पदाधिकारी बैठकमा पनि नेताहरुले चीनले सीमा मिचेको विषयमा प्रधानमन्त्री शेरबहादुर देउवासँग जवाफ मागेका थिए। बेलाबेला सीमा विवाद लिएर सांसद तथा नेताहरुले सरकारमाथि दबाब बढाइरहेका छन्।

यसैबीच सरकारले चीनसँगको सीमा विवाद अध्ययन गर्न छानबिन समिति गठन गर्ने भएको छ। बुधबार प्रधानमन्त्री निवास बालुवाटारमा बसेको मन्त्रिपरिषद् बैठकले हुम्ला जिल्लाका विभिन्न ठाउँमा देखिएका सीमा विवादबारे अध्ययन गर्न छानबिन समिति गठन गर्ने निर्णय गरेको हो।

सरकारका प्रवक्तासमेत रहेका कानुन, न्याय तथा संसदीय मामिलामन्त्री ज्ञानेन्द्रबहादुर कार्कीका अनुसार हुम्ला जिल्लाको नाम्खा गाउँपालिकाको लिमी लाप्चादेखि हिल्सासम्मको सीमा विवादको अध्ययन गरी नेपाल सरकारलाई प्रतिवेदन बुझाउनका लागि गृह मन्त्रालयका सहसचिवको नेतृत्वमा छानबिन समिति गठन गर्ने तयारी सरकारले गरेको छ।

उक्त छानबिन समितिमा नापी विभाग, नेपाल प्रहरी, सशस्त्र प्रहरीका अधिकारी र सीमाविद्हरुलाई समावेश गरिने बताइएको छ। छानबिन समितिले प्रतिवेदन बुझाएपछि सीमा विवादका विषयमा कुटनीतिक छलफल अघि बढाउने तरखरमा सरकार जुटेको छ।

सम्बन्धित समाचार

कतारबाट एनआरएनए सचीव पदमा टंकप्रसाद गैरेको उम्मेद्बारी घोषणा

मधेस प्रदेशमा आज सार्वजनिक बिदा

आजको मौसम : यी चार प्रदेशमा पानी पर्ने सम्भावना

आज इन्द्रजात्रा, उपत्यकामा सार्वजनिक बिदा