कांग्रेस सिन्धुपाल्चोक सभापतिमा जंगबहादुर तामाङ विजयी

दीप संञ्चार फागुन ३०, २०७८ गते ८:२७ मा प्रकाशित

काठमाडौँ -नेपाली कांग्रेस सिन्धुपाल्चोक सभापतिमा संस्थापन पक्षका जंगबहादुर तामाङ विजयी भएका छन् । दोस्रो चरणको निर्वाचनमा संस्थापनइतरका निकटतम प्रतिस्पर्धी वंशलाल तामाङलाई ६४ मतान्तरले पछाडि पार्दै जंगले जित हासिल गरेका हुन् ।

कुल १७ सय ८७ मतमा जंगबहादुरले ९१२ मत पाउँदा वंशलालले ८४८ मत प्राप्त पाएको निर्वाचन अधिकृत बेदबहादुर महतले जानकारी दिए ।

यसअघि शनिबार भएको निर्वाचनमा सभापतिमा तीन जना उम्मेदवार रहेका थिए । सो निर्वाचनमा कुनै पनि उम्मेदवारले ५१ प्रतिशत मत प्राप्त गर्न नसकेपछि आइतबार पुनः मतदान भएको थियो । प्रेमध्वज लामा पहिलो चरणबाट बाहिरिएका थिए ।

पहिलो चरणमा दोस्रो भएका वंशलाललाई प्रेमध्वजले समर्थन गरेका थिए । तर पनि उनले जित हात पार्न सकेनन् ।पूर्वजिल्ला सभापति तथा जिल्लाको क्षेत्र नम्बर १ मा एकछत्र राज गर्दै आएका मोहनबहादुर बस्नेत हाबी हुँदा यो स्थिति बनेको नेताहरू बताउँछन् ।

कांग्रेस सिन्धुपाल्चोकमा दोस्रो चरणको मतदान हुने, लामा बाहिरिए।

क्याटेगोरी : राजनीति
ट्याग : #नेपाली कांग्रेस