एमालेको सुर्खेत कार्यालय बन्दकर्ताले जलाए, कांग्रेस र माओवादीको कार्यालयमा पनि आगजनी

दीप संञ्चार फागुन १६, २०७८ गते २१:१२ मा प्रकाशित

सुर्खेत -सुर्खेतमा प्रमुख प्रतिपक्षी दल नेकपा एमालेको पार्टी कार्यालयमा आगजनी गरिएको छ । सोमबार साँझ वीरेन्द्रनगर नगरपालिका वडा नम्बर ६ मा रहेको एमाले जिल्ला कार्यालयमा बन्दकर्ताले तोडफोड र आगजनी गरेका हुन् ।

एमसीसी सम्झौता अनुमोदनको विरोधमा नेपाल बन्दको आह्वान गरेका ८ दलले सुर्खेतमा आगजनी र तोडफोड गरेको जनाइएको छ ।

सोमबार बन्दको आह्वान गर्नेमा नेत्रविक्रम चन्द नेतृत्वको नेकपा, मोहनविक्रम सिंह नेतृत्वको नेकपा मसाल, मोहन वैद्य नेतृत्वको नेकपा क्रान्तिकारी माओवादी, चित्रबहादुर केसी नेतृत्वको राष्ट्रिय जनमोर्चा, सीपी गजुरेल नेतृत्वको देशभक्त जनगणतान्त्रिक मोर्चा, ऋषि कट्टेल नेतृत्वको नेकपा, आहुति नेतृत्वको वैज्ञानिक समाजवादी कम्युनिस्ट पार्टी नेपाललगायतका दल छन् ।

त्यस्तै उनीहरुले नेपाली कांग्रेस र माओवादी केन्द्रको पार्टी कार्यालयमा पनि तोडफोड गरेका छन् । प्रहरी र बन्दकर्ताबीच साँझ ठाउँ(ठाउँमा झडप भएको छ । प्रहरीले केही बन्दकर्तालाई पक्राउसमेत गरेको छ ।

क्याटेगोरी : राजनीति
ट्याग : #आगो