एमसीसीबारे परराष्ट्रमन्त्री खड्काले एकाएक बोली फेरे, प्रधानमन्त्रीलाई चुनौती

काठमाडौँ

परराष्ट्रमन्त्री डा. नारायण खड्काले एमसीसी अहिलेकै अवस्थामा पास नहुने बताएका छन् । शनिवार विराटनगरमा सञ्चारकर्मीहरूसँग कुराकानी गर्दै मन्त्री खड्काले सबै दलको साथ सहयोगमा मात्रै एमसीसी पास हुने बताएका छन् ।

शुक्रवार मात्रै प्रधानमन्त्री शेरबहादुर देउवाले सुदूरपश्चिम पुगेर अहिलेकै अवस्थामा एमसीसी पास हुने बताएका थिए । तर, उनी निकट मन्त्री खड्काले भने सत्तारुढ गठबन्धन दल र प्रतिपक्षी दलले ल्याउने साझा धारणाका आधारमा मात्रै एमसीसी पास हुने बताएका हुन् ।

उनले प्रदेश १ र बागमती प्रदेशका विषयमा बाहिर हल्ला आए जस्तो नभएको बताएका छन् । बागमती प्रदेशमा आधा–आधा कार्यकाल समाजवादी र कांग्रेसले नेतृत्व गर्ने सहमति नभएको मन्त्री खड्काको भनाइ छ । ‘सत्तारुढ गठबन्धनमा भागबन्डा गर्नु परेकोले यो अवस्था सिर्जना भएको हो,’ उनले भने, ‘अझै गठबन्धनको बैठकमा छलफल हुनेछ ।’

यस्तै उनले अहिले ‘अर्ली इलेक्सन’ को सम्भावना नरहेको समेत बताए । ‘राजनीति सम्भावनाको खेल हो, सबैको सहमति भयो भने हुन पनि सक्छ,’ उनले भने । अर्को प्रसंगमा खड्काले कांग्रेसको महाधिवेशन तोकिएको समयमा नहुने बताए । ‘माघ पहिलो साताभन्दा अगाडि अधिवेशन हुने छाँटकाँट देखिएको छैन,’ उनले भने ।

सम्बन्धित समाचार

नेपाली जनसम्पर्क समिति कतारले आयोजना गरेको कार्यक्रममा ५२ जना द्वारा…

युएईमा संविधान दिवस तथा राष्ट्रिय दिवस मनाईयो

ग्लोबल युथ नेटवर्क बनाउदै जय नेपाल फाउन्डेसन

मुख्‍यमन्त्री कार्कीले पाए विश्वासको मत